काठमाडौं । राष्ट्रिय सभा सदस्यमा डा.अन्जान शाक्य नियुक्त भएकी छन् । उनलाई राष्ट्रपति रामचन्द्र पौडेलले सरकारको सिफारिसमा आज सांसद नियुक्त गरेका हुन् ।
राष्ट्रपति पौडेलले नेपालको संविधानको धारा ८६ को उपधारा (२) को खण्ड (ख) बमोजिम नेपाल सरकारको सिफारिसमा उनलाई नियुक्त गरेको राष्ट्रपति कार्यालयका प्रवक्ता शैलजा रेग्मी भट्टराईद्वारा जारी विज्ञप्तिमा उल्लेख छ ।
शाक्यलाई चैत ३० गते बसेको मन्त्रिपरिषद् बैठकले मनोनयका लागि राष्ट्रपतिसमक्ष सिफारिस गर्ने निर्णय गरेको थियो । शाक्य नेकपा एमालेको कोटाबाट राष्ट्रिय सभामा मनोनीत भएकी हुन् ।
इजरायलको लागि पूर्व नेपाली राजदूतसमेत रहेकी शाक्य गत वर्ष २ महिना राष्ट्रिय योजना आयोगको सदस्य बनेकी थिईन् । उनी एमालेको विदेश विभागकी सचिवसमेत हुन् ।
