काठमाडौँ । हास्य–व्यङ्ग्य पर्व ‘गाईजात्रा’ लाई लक्षित गर्दै काठमाण्डौ उपत्यकाका विभिन्न ठाउँमा प्रदर्शनी शुरु भएका छन् ।
कमलादीमा रहेको प्रज्ञा–प्रतिष्ठान र जमलमा रहेको नाचघरमा दुई समूहले दर्शकलाई मनोरञ्जन दिइरहेका छन् । पुरानासँगै नयाँ पुस्ताका कलाकारले भरिएको कार्यक्रम यही भदौ १० गतेसम्म चल्नेछ ।
गाईजात्रा पर्वको परम्परा र संस्कृतिसँगै प्रजातन्त्र, लोकतन्त्र र गणतन्त्र प्राप्तिपछि विद्यमान राजनीतिक, सामाजिक, आर्थिक विकृति र विसङ्गतिमाथि व्यङ्ग्य प्रहार गरेर कलाकारले आफ्नो प्रस्तुति दिने गरेका छन् ।
राष्ट्रिय नाच घर जमलमा सांस्कतिक संस्थानको आयोजनामा हिजोदेखि गाईजात्रा महोत्सव, २०८१ शुरु गरिएको छ ।
महोत्सवमा हिजो सिताराम कट्टेल र कुञ्जना घिमिरे–धुर्मुस–सुन्तली, पल्पसा चम्सुरी, जोगिन्दर, लक्ष्मण गाम्नाङ्गेलगायतका कलाकारले सामाजिक र राजनीतिक विकृतिविरुद्ध प्रस्तुती दिएका छन् ।
कार्यक्रममा भक्तपुरका नेवारी समुदायको माकः प्याखँ नृत्य पनि देखाइएको थियो । महोत्सव हरेक दिन बेलुका पाँच बजेदेखि शुरु हुनेछ ।
यसैबीच, प्रज्ञा प्रतिष्ठानमा ‘एकासीको गाईजात्रा’ नामक हास्यव्यङग्य कार्यक्रम अस्ति आइतवारदेखि भइरहेको छ ।
कार्यक्रममा हास्य कलाकार मनोज गजुरेल, शैलेन्द्र सिंखडा, चक्र दवाडी, यमन श्रेष्ठ, सुवोध गौतम, मेक्सम गौडेल, सजन श्रेष्ठ, सीता न्यौपाने, प्रभात लामा, प्रकृति गिरी र माड्सापको प्रस्तुति रहनेछ ।
