काठमाडौँ । नेपाली कांग्रेसका सभापति शेरबहादुर देउवाले वर्तमान गठबन्धन कसैको विरुद्धमा लाग्नका लागि नबनाइएको स्पष्ट पारेका छन् ।
मंगलबार काठमाडौमा आयोजित नेपाली कांग्रेसका स्वर्गीय नेता तथा समाजवादी चिन्तक प्रदीप गिरीको दोस्रो स्मृति सभालाई सम्बोधन गर्दै देउवाले कांग्रेस र एमालेको गठबन्धन कुनै पनि पार्टीको विरुद्धमा नभएको स्पष्ट पारेका हुन् ।
गठबन्धन अरू पार्टीको खिलाफ हैन । सबैलाई एक साथ राखेर अघि बढ्ने हो । कांग्रेस र नेकपा एमालेको गठबन्धन कसैले दबाब नदिएको पनि बताए ।
यस्तै देउवाले संविधान संशोधन सबै दलहरूको सल्लाह सुझावमा नै हुने भएकाले कुनै शङ्का नगर्न आग्रह गरे ।
पूर्वप्रधानमन्त्री समेत रहेका देउवाले राष्ट्रिय सभाको अध्यक्ष उपराष्ट्रपतिलाई बनाउने लगायत विषय संविधान संशोधनको एजेन्डाभित्र पर्ने बताए ।
उनले संविधान संशोधन सबैसँग सल्लाह गरेर गरिने कुरा हो । अहिलेको गठबन्धनले नेपालको भोलिको राजनीति र भविष्यलाई योगदान दिने समेत दाबी गरे ।
