काठमाडौं । नेपाली कांग्रेसका सभापति शेरबहादुर देउवाले वीपी कोइरालाका बारेमा व्यापक अध्ययन र अनुसन्धान हुन जरुरी रहेको बताएका छन् ।
काठमाडौंमा मंगलबार आयोजित कार्यक्रममा देउवाले प्रजातान्त्रिक समाजवाद संसारकै उत्तम समाजवाद भएको बताए । सभापति देउवाले वीपी कोइरालालाई सानो देशको ठूलो नेताका रूपमा चित्रण गरेका छन् ।
वीपीलाई ज्ञान नभएको विषय नै नरहेको सभापति देउवाले बताएका छन् । उनले वीपी धेरै विषयको ज्ञानी भए पनि समयानुसार केही कुराहरू परिवर्तन हुने बताए ।
देउवाले वीपीले त्यो बेलामा सबैले गाई पाल्नुपर्छ भनेको तर, अहिले सबैलाई दूध खुवाउनुपर्छ भनेर डेरी कन्सेप्ट आएको बताए । उनले गाई सबैले पाल्नुपर्छ भन्दा पनि सबैले दूध पिउन पाउनुपर्छ भन्ने कुरा महत्वपूर्ण रहेको बताए ।
देउवाले भने, ‘वीपी कोइराला सानो देशको ठूलो नेता हो । उहाँलाई ज्ञान नभएको विषय नै थिएन । धेरै विषयको ज्ञानी हुनुहुन्थ्यो । कति कुराहरू समयअनुसार पनि चेन्ज हुन्छ । जस्तै उहाँले गाई पाल्ने कुरा गर्नुभएको थियो । आज गाई पाल्ने कुरा भन्दा पनि आज ठाउँ ठाउँमा बाटो पुग्ने, बिजुली, बत्ती पुगेको छ । आज गाई पाल्नु भन्दा पनि दूध सप्लाई गर्न डेरी सञ्चालन गर्ने हो ।’
‘घरघरमा दूध बालबच्चाले पाउन् भनेको मतलब गाई पाल्नु भन्दा पनि बालबालिकालाई दूध खुवाउनु ठूलो कुरा हो । आज डेरी कन्सेप्ट ठूलो कुरा हो’, देउवाले भने, ‘समयमा धेरै कुरा चेन्ज हुन्छन् । वीपी कोइराला अलराउण्डर हो । साहित्यमा त्यत्तिकै उत्कृष्ट हुनुहुन्थ्यो । वीपी कोइरालाका बारेमा व्यापक अध्ययन र अनुसन्धान हुनु जरुरी छ ।’
