काठमाडौं । नेपाली कांग्रेस सभापति एवं पूर्वप्रधानमन्त्री शेरबहादुर देउवाले गण्डकी प्रदेश सभा सदस्य एवं नेपाली कांग्रेसकी नेतृ विमला गौचनको निधनप्रति दु:ख व्यक्त गरेका छन् ।
सभापति देउवाले गौचनको आत्माको चीर शान्तिको कामना गदैँ उनको परिवारमा गहिरो समवेदना व्यक्त गरेका छन् ।
गौचनको काठमाडौंको ग्राण्डी अस्पतालमा डेंगीको उपचारका क्रममा बुधबार राति ६३ वर्षको उमेरमा निधन भएको हो ।
नेपाली कांग्रेस म्याग्दीका पूर्वसभापति रेशमबहादुर बानियाका अनुसार उनी अस्वस्थ भएपछि ग्राण्डी अस्पताल पुर्याइएको थियो ।
डेंगी संक्रमित उनलाई राति हृदयघात भएको बताइएको छ । गौचनको शव अस्पतालमै राखिएको उनले बताए । उनका छोरा अमेरिकाबाट आएपछि अन्त्येष्टि गरिने पारिवारिक स्रोतले जनाएको छ । गौचन नेपाली कांग्रेसबाट समानुपातिक सांसद थिए ।
