काठमाडौँ । लगातारको बाढी र पहिरोका कारण देशका विभिन्न प्रदेशका प्रमुख राजमार्ग तथा सडकखण्डमा यातायात सेवा प्रभावित भएको छ। नेपाल प्रहरीले सार्वजनिक गरेको पछिल्लो विवरणअनुसार बागमती, गण्डकी र कर्णाली प्रदेशका विभिन्न सडकखण्डमा कतै पूर्ण रूपमा र कतै एकतर्फी रूपमा यातायात सञ्चालन भइरहेको छ।
विशेषगरी रसुवामा बाढीका कारण प्रमुख राजमार्गहरू पूर्ण रूपमा अवरुद्ध भएका छन्। प्रहरीले अर्को सूचना जारी नभएसम्म ती सडकखण्ड बन्द रहने जनाएको छ।
पृथ्वीराजमार्गअन्तर्गत धादिङको गजुरी गाउँपालिका–२ चालिसेमा पहिरो खसेपछि सडक एकतर्फी सञ्चालनमा छ। पहिरोका कारण सडकको आवागमन प्रभावित भए पनि एकतर्फी रूपमा सवारी सञ्चालन भइरहेको प्रहरीले जनाएको छ।
गण्डकी प्रदेशमा बाढी तथा पहिरोका कारण विभिन्न सडकखण्डमा यातायात प्रभावित भएको छ। बेंसीसहर हुँदै खाङसार जाने मनाङ सडक बाढीका कारण पूर्ण रूपमा अवरुद्ध भएको छ। त्यस्तै, कालीगण्डकी करिडोरअन्तर्गत जैमिनी नगरपालिका–८ बेलबगरमा पहिरो खसेपछि सडक एकतर्फी सञ्चालनमा रहेको छ।
बेनी–जोमसोम सडकखण्डअन्तर्गत म्याग्दीको रघुगंगा गाउँपालिका–२ बैसरी र अन्नपूर्ण गाउँपालिका–३ सुकेबगरमा पहिरो गएपछि यातायात पूर्ण रूपमा ठप्प भएको छ। बेनी–दरबाङ सडकअन्तर्गत बेनी नगरपालिका–४ घुमाउने भिरमा पहिरो खसेपछि सडक अवरुद्ध भएको प्रहरीले जनाएको छ।
मुस्ताङको जोमसोम–कोरला सडकखण्ड पनि पहिरोका कारण प्रभावित भएको छ। थासाङ गाउँपालिका–४ काब्रेभिर तथा लो–घेकर दामोदरकुण्ड गाउँपालिका–२ मा पहिरो खसेपछि सडक पूर्ण रूपमा बन्द भएको छ।
नवलपरासी (बर्दघाट सुस्तापूर्व) मा कालीगण्डकी करिडोरका विभिन्न स्थानमा पनि यातायात प्रभावित छ। बुलिङटार गाउँपालिका–६ सेल्फीडाँडा/घुमाउरीघाटमा सडक एकतर्फी सञ्चालनमा रहेको छ। बौदीकाली गाउँपालिका–३ जन्ती पहिरोमा पनि कालीगण्डकी करिडोर एकतर्फी सञ्चालनमा रहे पनि ठूला सवारीसाधन आवतजावत गर्न सक्ने अवस्था नरहेको प्रहरीले जनाएको छ।
यस्तै, कर्णाली प्रदेशमा कर्णाली करिडोरअन्तर्गत हुम्लाको खार्पुनाथ गाउँपालिका–१ मुसेडी र सर्केगार्ड गाउँपालिका–६ स्यालतडीमा पहिरो खसेपछि सडक पूर्ण रूपमा अवरुद्ध भएको छ।
बाढी तथा पहिरोका कारण राजमार्ग र ग्रामीण सडकहरू प्रभावित भइरहेकाले प्रहरीले सम्बन्धित सडकखण्डको अवस्था बुझेर मात्र यात्रा गर्न तथा जोखिमयुक्त क्षेत्रमा विशेष सावधानी अपनाउन आग्रह गरेको छ।
