काठमाडौं । नेपाली कांग्रेसका सभापति शेरबहादुर देउवाले नेकपा एमालेसँगको सत्ता–सहकार्य तत्कालै टुट्ने सम्भावना नरहेको बताएका छन् । पार्टीको केन्द्रीय कार्यसमिति बैठक समापन गर्दै देउवाले वर्तमान गठबन्धन राम्रोसँग सञ्चालन भइरहेकाले विकल्प खोज्ने अवस्था नरहेको प्रस्ट पारे ।
बैठकमा सहभागी एक नेताका अनुसार देउवाले एमालेसँगको सहकार्य राजनीतिक स्थायित्व र आर्थिक विकासका लागि गरिएको उल्लेख गर्दै, “सहमति अनुसार नै गठबन्धन अघि बढ्छ,” भनेका थिए । उनले गठबन्धनभित्र कहिलेकाहीं साना समस्या आउनु स्वाभाविक भएको जनाउँदै, महत्वपूर्ण निर्णयहरू सहमतिमै भइरहेका बताए ।
बैठकमा सहभागी केही नेताहरूले सरकार प्रभावकारी हुन नसकेको भन्दै अब कांग्रेसले नेतृत्व लिनुपर्ने सुझाव दिएका थिए । त्यसको जवाफमा देउवाले गठबन्धन यथावत् रहने विश्वास दिलाएका थिए ।
महामन्त्री गगन थापाले पनि सरकारको विकल्प नखोजिने बताएका छन् । बरु सरकारलाई प्रभावकारी बनाउन मन्त्री फेरबदल आवश्यक रहेको उनको तर्क थियो ।
