काठमाडौं । नागढुंगा–सिस्नेखोला सुरुङ मार्गमा ट्राफिक नियम उल्लंघन गर्ने २८४ जना सवारी चालक कारबाहीमा परेका छन् । सुरुङभित्र लेन अनुशासन उल्लंघन गर्ने, तोकिएको भन्दा बढी गतिमा सवारी चलाउने, जथाभावी ओभरटेक गर्ने, अनावश्यक हर्न बजाउने तथा सवारी आवागमनमा अवरोध पुर्याउने चालकलाई ट्राफिक प्रहरीले कारबाही गरेको हो ।
उपत्यका ट्राफिक प्रहरी कार्यालयका प्रवक्ता नरेशराज सुवेदीका अनुसार सुरुङ मार्ग सञ्चालनमा आएदेखि नै नियम उल्लंघन गर्ने सवारी तथा चालकलाई निगरानीमा राख्दै आवश्यक कारबाही गरिँदै आएको छ । सुरुङभित्र सवारीको अधिकतम गति प्रतिघण्टा ४० किलोमिटर तोकिएको छ । यसबारे सुरुङ मार्गमै सूचना तथा संकेत बोर्ड राखेर चालकलाई जानकारी गराइएको प्रहरीले जनाएको छ ।
प्रवक्ता सुवेदीका अनुसार तोकिएको गतिभन्दा तीव्र गतिमा सवारी चलाउने चालकलाई समेत नियमअनुसार कारबाही गरिएको छ । सुरुङभित्रको सीमित स्थान र विशेष प्रकृतिको सडक संरचनाका कारण सामान्य सडकको तुलनामा थप सावधानी अपनाउन प्रहरीले चालकलाई आग्रह गरेको छ ।
प्रहरीले सुरुङभित्र लेन अनुशासन कायम राख्न, निर्धारित गतिमा मात्र सवारी चलाउन, अनावश्यक हर्न प्रयोग नगर्न र ओभरटेक गर्दा विशेष सतर्कता अपनाउन अनुरोध गरेको छ ।
बिहीबार मात्रै सुरुङ मार्गभित्र ट्राफिक नियम उल्लंघन गरेको आरोपमा थप १३ जना चालक कारबाहीमा परेका छन् । प्रहरीले सुरुङ मार्गमा दुर्घटनाको जोखिम कम गर्न नियमित निगरानी र नियम उल्लंघन गर्ने चालकविरुद्ध कारबाहीलाई निरन्तरता दिने जनाएको छ ।
