काठमाडौं । विदेशमा रहेका नेपाली नागरिक तथा अन्तरजिल्लाबाट मतदान गर्न पाउने व्यवस्था गर्ने विषयमा निर्वाचन आयोगले राजनीतिक दलहरूसँग छलफल थालेको छ ।
आयोगले यस विषयमा राजनीतिक सहमति जुटाउने उद्देश्यले शुक्रबार केन्द्रीय कार्यालयमा तीनै तहमा प्रतिनिधित्व गर्ने राजनीतिक दलका नेताहरूसँग छलफल गर्दैछ । छलफलमा ४० भन्दा बढी राजनीतिक दलका प्रतिनिधि सहभागी हुने आयोगका सूचना अधिकारी सुमन घिमिरेले जानकारी दिए ।
बैठकमा विदेशमा रहेका नेपाली नागरिकलाई मतदानको व्यवस्था गर्ने तथा एक जिल्लाबाट अर्को जिल्लामा रहेका मतदाताले मतदान गर्न पाउने व्यवस्थाका विषयमा छलफल हुनेछ । साथै निर्वाचन व्यवस्थापनमा सूचना प्रविधिको प्रयोग लगायतका विषयमा पनि दलहरूसँग सुझाव लिने आयोगले जनाएको छ ।
राजनीतिक दलसम्बन्धी ऐन, २०७३ को दफा ४७ अनुसार आयोगले राजनीतिक दलहरूसँग परामर्श गर्न लागेको हो । निर्वाचनसम्बन्धी कानुनी तथा व्यवस्थापकीय सुधारका लागि दलहरूको धारणा लिने उद्देश्यले छलफल आयोजना गरिएको आयोगले जनाएको छ ।
विदेशमा रहेका नेपाली नागरिकलाई मतदानको अधिकार दिने तथा अन्तरजिल्ला मतदानको व्यवस्था गर्ने माग लामो समयदेखि उठ्दै आएको छ । तर, आवश्यक कानुनी व्यवस्था, मतदाता पहिचान, मतदानको व्यवस्थापन तथा प्रविधिको प्रयोगलगायतका विषयमा चुनौती रहेकाले यस्तो व्यवस्था कार्यान्वयन हुन सकेको छैन ।
आयोगले यससम्बन्धी एकीकृत कानुनको मस्यौदा तयार गरी गृह मन्त्रालयमा पठाएको लामो समय भए पनि त्यससम्बन्धी प्रक्रिया अघि बढ्न सकेको छैन । राजनीतिक दलहरूसँगको छलफलपछि कानुनी तथा व्यवस्थापकीय प्रक्रियालाई अगाडि बढाउने विषयमा आयोगले थप पहल गर्ने अपेक्षा गरिएको छ ।
