काठमाडौं । संगीत रोयल्टी संकलन समाज नेपालले गीतकार, संगीतकार तथा स्रष्टाहरूलाई रोयल्टी रकम वितरण गरेको छ।
समाजले टिकटक, यातायात क्षेत्र, रेडियो, होटल तथा स्वदेश–विदेशबाट संकलन भएको रोयल्टी रकम गीतकार, संगीतकार तथा स्रष्टाहरूलाई वितरण गरेको हो।
समाजको स्थापना दिवस तथा १९औँ वार्षिकोत्सवको अवसरमा काठमाडौंस्थित नेपाल प्रज्ञा–प्रतिष्ठानमा आयोजित कार्यक्रममा संस्थामा सदस्यता लिएर आफ्ना गीत तथा सिर्जना दर्ता गरेका गीतकार, संगीतकार तथा स्रष्टाहरूको अनुमति प्राप्त प्रकाशकहरूलाई रोयल्टी वितरण गरिएको हो।
समाजका अनुसार दर्ता नभएका गीत तथा स्रष्टाहरूको अभिलेख उपलब्ध नहुने भएकाले उनीहरू रोयल्टी प्राप्तिबाट वञ्चित हुने गरेका छन्। यही विषयलाई केन्द्रमा राख्दै प्रमुख कार्यकारी सागर पाण्डेको संयोजकत्वमा रोयल्टी प्राप्त गर्ने प्रक्रिया, आवश्यक मापदण्ड तथा रोयल्टी संकलन हुने विभिन्न क्षेत्रबारे जानकारीमूलक प्रस्तुति समेत गरिएको थियो।
यस अवसरमा संगीत रोयल्टी संकलन समाज नेपालको नयाँ वेबसाइट पनि सार्वजनिक गरिएको छ। संस्थाका सदस्य गीतकार तथा संगीतकारहरूले उक्त वेबसाइटमा लगइन गरी आफ्नो मोबाइल नम्बर र पासवर्डमार्फत कुन गीतबाट, कुन माध्यमबाट र कति रोयल्टी रकम संकलन भएको छ भन्ने विवरण हेर्न सक्ने व्यवस्था गरिएको जनाइएको छ।
समाजका अनुसार सदस्यहरूले आफूलाई अनुकूल समयमा संकलित रोयल्टी रकम सिधै आफ्नै बैंक खातामा जम्मा गर्न सक्ने सुविधा पनि छिट्टै लागू गरिनेछ।
कार्यक्रममा समाजका अध्यक्ष सुरेश अधिकारी ले कार्यालयमा उपस्थित हुन नसक्ने गीतकार तथा संगीतकारहरूले फोनमार्फत जानकारी लिनुका साथै वेबसाइटबाटै आफ्ना गीत तथा सिर्जना दर्ता गर्न सक्ने व्यवस्था मिलाइएको जानकारी दिए।
उनले सबै स्रष्टाहरूलाई आफ्नो सिर्जना दर्ता गरी रोयल्टी प्राप्त गर्ने अधिकार सुनिश्चित गर्न आग्रह गर्दै डिजिटल प्रणालीमार्फत सेवा थप सहज र पारदर्शी बनाउने लक्ष्य रहेको बताए।
