लुम्बिनी । राष्ट्रिय योजना आयोगले सोह्रौं योजना तर्जुमा सम्बन्धी अन्तरक्रिया कार्यक्रम लुम्बिनीमा सम्पन्न गरेको छ । आयोगले लुम्बिनी प्रदेशका १०९ वटै पालिकालाई समेटेर सोह्रौं योजना तर्जुमा सम्बन्धी अन्तरक्रिया कार्यक्रम गरेको हो ।
कार्यक्रममा बोल्दै लुम्बिनी प्रदेशका गृहमन्त्री सन्तोषकुमार पाण्डेयले संघीय शासन प्रणालीको मर्म अनुरुप हुनुपर्ने बताउनुभयो । उहाँले तीन तहले गरेका विकासको प्रयासलाई मार्गदर्शन एवम् समन्वय गर्न आवश्यक रहेको औल्याउनुभयो । मन्त्री पाण्डेयले विगतका विकास प्रयास र उपलब्धीको यथार्थ मूल्यांकन गर्दै सबै निकाय र पदाधिकारीले आ–आफ्नो तहमा जिम्मेवार एवम् ईमान्दारिताका साथ देशको विकासमा लाग्नुपर्ने बताउनुभयो ।
त्यसैगरी योजना आयोगका सदस्य डा. रमेश पौडेलले सोह्रौँ योजनाको प्रस्तावित मस्यौदा उपर छलफलका क्रममा प्राप्त सुझावहरूलाई योजनामा यथोचित सम्बोधन गरिने प्रतिवद्धता व्यक्त गर्नुभयो । यसैगरी आयोगका सहसचिव महेश भट्टराईले चालु पन्ध्रौँ योजनाको पहिलो चार वर्षको प्रगति अवस्थाको समीक्षासहित प्रस्तावित सोह्रौँ योजनाको आवश्यकता र यसको प्रारम्भिक मस्यौदाले समेटेका विषयवस्तुको बारेमा प्रस्तुत गर्नुभएको थियो ।
लुम्बिनी प्रदेश योजना आयोगका उपाध्यक्ष डा. नहकुल के.सीले प्रदेशका योजना र त्यसको कार्यन्वयनमा यस अन्तरक्रिया कार्यक्रमले सहज र प्रभावकारी हुने कुरामा जोड दिनुभयो ।
कार्यक्रममा प्रदेश सरकारका मन्त्रीहरु,प्रदेश योजना आयोगका उपाध्यक्ष,प्रमुख सचिव, प्रदेश योजना आयोगका सदस्यहरू, लुम्बिनी प्रदेश भित्रका जिल्ला समन्वय समितिका प्रमुखहरू, प्रदेश मन्त्रालयका सचिवहरू, प्रदेश भित्रका सबै नगरपालिका तथा गाउँपालिकाका प्रमुख/उपप्रमुख तथा अध्यक्ष/उपाध्यक्ष र प्रमुख प्रशासकीय अधिकृत लगायत विभिन्न सरोकारवालाहरुको उपस्थिति रहेको थियो ।
