काठमाडौं । नेपाली कांग्रेसका प्रवक्ता एवं निवर्तमान अर्थमन्त्री डा. प्रकाशशरण महतले प्रधानमन्त्री पुष्पकमल दाहाल ‘प्रचण्ड’ को कदमले अस्थिरता र अन्यौलता सिर्जना भएको बताउनुभएको छ ।
मंगलबार प्राइम टाइम्स टेलिभिजनको जनता जान्न चाहन्छन् कार्यक्रममा उहाँले कांग्रेस–माओवादीको गठबन्धन टुट्दा मुलुकमा अन्यौलता र अस्थिरता सिर्जना भएको बताउनुभएको हो ।
उहाँले माओवादी–एमाले गठबन्धन धेरै लामो समय नटिक्ने दाबी गर्नुभयो । एमालेसहितको बनेको नयाँ गठबन्धनमा बन्न नपाउँदै असन्तुष्टि सिर्जना भएको बताउनुभयो ।
‘हामी प्रतिपक्षमा छौं, प्रतिपक्षमा भएपनि मलाई के लाग्छ भने जुन दिशातर्फ प्रचण्डले उन्मुख गराउनुभएको छ, अस्थिरता र अन्यौलतातर्फ । यो उहाँको धेरै टिक्दैन ।’ उहाँले भन्नुभयो,
‘अहिले नै देखिइराखेको छ, हरेकले यो चाहियो, त्यो चाहियो, यो भएन भने हामी बस्दैनौं भन्ने कुरा बन्न पाएको छैन सुरुवात भएको छ । हामीले त त्यसमा कुनै भूमिका खेलेको छैनौं । हामी त चुप लागेर बसेका छौं । समस्या त सुरुमै देखिएको छ नि ।’
माओवादीले गठबन्धन तोडेर आफूहरु प्रतिपक्षमा पुग्दा कांग्रेसलाई कुनै बेफाइदा नभएको बताउनुभयो । उहाँले कालान्तरमा प्रचण्डको यो निर्णयबाट उहाँलाई नैबेफाइदा हुने अर्थमन्त्री महतको दाबी छ । कांग्रेसले २०७९ मंसिरमा भएको आम निर्वाचनपछि दुई पटक यू टर्न लिएको भन्दै उहाँले असन्तुष्टि व्यक्त गर्नुभयो ।
‘कांग्रेस कुनै निरिह भएको छैन । यसले कांग्रेसलाई कुनै बेफाइदा भएको छैन । प्रचण्डले विश्वासमा काम गर्नुभएन । दुई पटकसम्म यू टर्न गर्नुभयो । यसबाट बेफाइदा कसैलाई छ भने उहाँलाई नै हुँदैछ,’– उहाँले भन्नुभयो ।
