काठमाडौं । पूर्वसभामुख अग्नि सापकोटाविरुद्धको मुद्दामा सर्वोच्च अदालतले २३ जेठमा सुनुवाइ गर्ने भएको छ ।
बुधबार प्रधानन्यायाधीश विश्वम्भरप्रसाद श्रेष्ठ, प्रकाशमान सिंह राउत, सपना प्रधान मल्ल, प्रकाशकुमार ढुंगाना र कुमार रेग्मी सम्मिलित संवैधानिक इजलासमा सुनुवाइ नसकिएपछि मुद्दा हेर्दाहेर्दैमा राखिएको छ ।
अब यो मुद्दामा २३ जेठमा सुनुवाइ हुने सर्वोच्च अदालतका सहायक प्रवक्ता गोविन्दप्रसाद घिमिरेले जानकारी दिए ।
सशस्त्र युद्धको समयमा काभ्रेका अर्जुन लामाको अपहरणपछि हत्या भएको घटनामा अर्जुनकी पत्नी पूर्णिमायाले सापकोटासहित माओवादी नेता कार्यकर्ताविरुद्ध किटानी जाहेरी दिएकी थिइन् । तर लामो समयसम्म प्रहरीले जाहेरी नै लिन मानेन । सर्वोच्च अदालतले २२ फागुन २०६४ मा आदेश दिएपछि मात्र जाहेरी दर्ता भएको थियो
तर सापकोटाविरुद्ध प्रहरीले जारी गरेको पक्राउ पुर्जी तत्कालिन बाबुराम भट्टराई नेतृत्वको सरकारले तामेलीमा राख्ने निर्णय गरेको थियो ।
सरकारको उक्त निर्णयविरुद्ध लामाकी पत्नीले सर्वोच्च अदालतमा २०६९ मंसिर ७ गते दिएको रिट संवैधानिक इजलासमा विचाराधीन छ ।
सापकोटा जोडिएको उक्त मुद्दामा मानव अधिकारकर्मी सुशील प्याकुरेलसमेतले प्रधानमन्त्री कार्यालयलाई विपक्षी बनाई दायर गरेको रिट पनि सर्वोच्च अदालतले एकसाथ राखेर सुनुवाइ गरेको छ ।
त्यस्तै अग्नि सापकोटाले कनकमणि दीक्षितविरुद्ध दिएको अदालतको अवहेलना मुद्दा पनि यी मुद्दाहरुसँगै सुनुवाइ भइरहेको छ ।
यो मुद्दा २०७२ चैत २२ गते तत्कालिन न्यायाधीश सुशीला कार्की र ओमप्रकाश मिश्रले संवैधानिक इजलासले हेर्ने आदेश गरेका थिए ।
त्यसपछि संवैधानिक इजलासमा १५ पटक भन्दा बढी पेशी तोकिए पनि कहिले हेर्न नभ्याइने र कहिले हेर्न नमिल्ने भनी मुद्दा सरेको स¥यै भइरहेको छ ।
