काठमाडौं । संघीय लिम्बुवान पार्टी नेपालबाट जसपा नेपालमा समाहित भएका नेताहरूले जसपा नेपाल छाडेका छन् । बिहीबार काठमाडौंमा पत्रकार सम्मेलन गर्दै उनीहरूले पार्टी विभाजनप्रति असन्तुष्टि जनाउँदै जसपा नेपाल छाडेको घोषणा गरेका हुन् ।

उनीहरूले प्रा. डा. महेन्द्र लावतीको संयोजकत्वमा पहिचानवादी मोर्चा घोषणा गरेका छन् । पत्रकार सम्मेलनमा लावतीले पछिल्लो समय पार्टीको मुख्य नेतृत्व पहिचानले निर्दिष्ट गरेको मुद्दाभन्दा पनि सत्ताको खेलमा लागेको, गैरलोकतान्त्रिक आचरण अवलम्बन गरेको, पहिचानको आन्दोलनमा सक्रिय नभएको आरोप लगाए ।

उनले अहिले आफूहरूले जसपा नेपाल वा जसपा कुनैको पक्ष नलिने तर पहिचानवादीसँग सहकार्य गर्ने बताए । नेपालमा सदियौँदेखि एकल जातीय राज्य स्थापित भएको र अहिले पनि त्यो कायमै रहेको उनको भनाइ छ । उनले नेपाली राज्य बहुजातीय हुनुपर्ने र सबैको पहिचान स्थापित हुनुपर्नेमा जोड दिए ।

जसपा नेपालमा पहिचानबारे विचार राम्रोसँग समेटिएकाले आफूहरू पहिला उक्त पार्टीमा लागेको उनले उल्लेख गरे । तर, पछिल्लो समय पहिचानको आन्दोलन र त्यसको विस्तारमा जसपा नेतृत्वले समर्थन नगरेको उनले बताए । मोर्चाले प्रदेश नम्बर–१ पुनः नामांकन संयुक्त संघर्ष समितिलाई सघाउने उनको भनाइ छ ।