काठमाडौं – मंगलबार बिहान ११ बजे संघीय संसद भवनमा नीति तथा कार्यक्रमको रिहर्सल हुने भएको छ।
प्रतिनिधि सभाका सभामुख देवराज घिमिरेको निजी सचिवालयका अनुसार संघीय संसद भवन नयाँ बानेश्वरमा बिहान ११ बजे नीति तथा कार्यक्रमको रिहर्सल हुन लागेको हो।
त्यस लगत्तै सभामुख देवराज घिमिरेले १२ः३० बजे दलक प्रमुख सचेतकसँग छलफल गर्ने छन्। यो छलफल सभामुखको कार्यकक्ष संघीय संसद भवन नयाँ बानेश्वरमा हुनेछ।
दिउँसो १ बजे कार्यव्यवस्था तथा परामर्श समितिको बैठक बस्नेछ। समिति बैठक संघीय संसद भवनको शंकर हल नयाँ बानेश्वरमा बस्ने सभामुखको सचिवालयले सार्वजनिक गरेको सूचनामा उल्लेख छ।
दिउँसो ३ बजे संयुक्त सदनको बैठक बस्नेछ भने साँझ ६ बजे प्रतिनिधि सभाको बैठक बस्नेछ। आज सरकारले आगामी आर्थिक वर्षको नीति तथा कार्यक्रम पेस गर्ने तयारी गरिरहेको अवस्थामा कसरी प्रस्तुत हुने भन्ने विषयमा प्रमुख प्रतिपक्षी दल नेपाली कांग्रेसले बिहानै संसदीय दलको बैठक बोलाएको छ।
