काठमाडौँ । सरकारले आगामी आर्थिक वर्षका लागि १८ खर्ब ६० अर्ब ३० करोड रुपैयाँको बजेट ल्याएको छ । चालुतर्फ ११ खर्ब ४० अर्ब ६६ करोड, पुँजीगततर्फ ३ खर्ब ५२ अर्ब ३५ करोड र वित्तीय व्यवस्थापनतर्फ ३ खर्ब ६७ अर्ब १८ करोड रुपैयाँ विनियोजन गरेको छ ।
नेपाली कांग्रेस केन्द्रिय सदस्य डा.डिला सग्रौंलाले भन्छिन, बजेट भाषणमा उल्लेख भएका कार्यक्रम झट्ट हेर्दा र सुन्दा लोकप्रिय छन् । तर पुराना आयोजनालाई अलपत्र पार्ने र जनताका उद्देश्य पुरा नहुने किसिमका कार्यक्रमहरु आएका छन् ।
वैदेशिक अनुदान ५२ अर्ब ३३ करोड, वैदेशिक ऋण २ खर्ब १७ अर्ब ६७ करोड र आन्तरिक ऋण ३ खर्ब ३० अर्ब रुपैयाँ उठाउने लक्ष्य लिइएको छ आगामी आर्थिक वर्ष ६ प्रतिशत आर्थिक वृद्धि हुने र मुद्रा स्फीति ५.५ प्रतिशतमा सीमित रहने अनुमान गरिएको छ ।
डा.सग्रौंलाले अहिलेको बजेट अनुसार लगानी आउने र उत्पादन बढ्नेमा आशावादी हुन नसकिने बताएकी छन । ६ प्रतिशतको आर्थिक वृद्धिदरमा पुग्न सकिने अवस्था देखिदैन भने बजेटरी सुधार केही छैन । कृषि उत्पादनमा आधारित अनुदान दिने व्यवस्था कटौती गर्नु दुर्भाग्यपूर्ण छ । बजेटलाई कनिका जसरी छर्ने प्रबृत्तिले विकासमा सोचे अनुसारको परिणाम नदिने उनको भनाई छ ।
पुर्वसासंद समेत रहेकी डा.सग्रौंलाले अहिलेको बजेटमा आफ्ना कार्यकर्ता र समर्थकबाट आएका योजना प्राथमिकतामा राखिएको जिकिर गरिन । ठूला आयोजना सम्पन्न गर्ने गरी बजेट विनियोजन गरिएको छैन । सरकारले सबै क्षेत्रलाई छुने गरी बजेट ल्याएको तर लक्ष्यमा पुग्ने गरी नल्याएको भन्दै बजेटबाट उत्साहित हुने अवस्था नरहेको बताईन।
