पोखरा।फ्लोर क्रस’ गरेर मुख्यमन्त्री सुरेन्द्र पाण्डेलाई विश्वासको मत दिएका गण्डकी प्रदेश सभा सदस्य फणीन्द्र देवकोटालाई नेकपा माओवादी केन्द्रले २४ घण्टे स्पष्टीकरण सोधेको छ ।
नेकपा माओवादी केन्द्र गण्डकी प्रदेशकी प्रमुख सचेतक कुसुम बुढाले पार्टीद्वारा जारी ह्वीप उलंघन र दलको विधानविपरीत गरेका २४ घण्टे स्पष्टीकरण सोधिएको खबरहबलाई बताइन् ।
डा. बाबुराम भट्टराई नेतृत्वको नेपाल समाजवादी पार्टीका नेता देवकोटा २०७९ को निर्वाचनमा गोरखाबाट माओवादीको चुनाव चिह्नबाट निर्वाचित भएका हुन् ।
तर उनले कांग्रेस दलका नेता पाण्डेलाई विश्वासको मत दिँदा माओवादीको ह्वीप पालना गरेका थिएनन् । ह्वीप उलंघन गर्दै ‘फ्लोर क्रस’ गरेका देवकोटा तत्कालै गण्डकीको ऊर्जा तथा जलश्रोत मन्त्री भइसकेका छन् ।
प्रमुख सचेतक बुढाका अनुसार मन्त्री भइसकेका देवकोटालाई बुधबार साँझ ७ बजेसम्म लिखित जवाफ दिन निर्देशनसहित स्पष्टीकरण सोधिएको हो ।
‘पार्टी केन्द्रको समेत परामर्शमा देवकोटासँग स्पष्टीकरण सोधेका छौँ, बुधबार साँझ ७ बजेसम्मलाई समय दिएका छौँ’, उनले भनिन्, ‘देवकोटामाथि कारबाही प्रक्रिया अघि बढेको छ । आज साँझसम्म स्पष्टीकरणको प्रतिक्षामा छौँ। त्यसपछि थप निर्णय लिन्छौँ ।’
देवकोटा माओवादीको चुनाव चिह्नबाट विजयी भएका हुन् । तर निर्वाचन आयोगको उम्मेदवार र विजयीहरूको सूचीमा देवकोटाको नाम नेपाल समाजवादी पार्टी भनेरै उल्लेख गरिएको छ । उता गण्डकी प्रदेश सभा सदस्यको सूचीमा भने उनको नाम नेकपा माओवादी केन्द्रका सांसदका रुपमा छ ।
