परासी । उद्योग, वाणिज्य तथा आपूर्ति मन्त्री दामोदर भण्डारीले शुक्रबार वरूण बेभरेज (नेपाल) प्रा.लि(पेप्सी) द्धारा सञ्चालित २ मेगावाटको सोलार पावर प्लान्टको उद्घाटन गरेका छन ।
उद्घाटन समारोहमा बोल्दै मन्त्री भण्डारीले उद्योग वातावरणमैत्री र रोजगारमूलक हुनुपर्नेमा जोड दिएका छन । लगानीकर्ताहरुलाई प्रोत्साहित गर्न र आन्तरिक तथा बाहय लगानी प्रवर्धन गर्न अध्यादेश सम्बन्धी कानुन ल्याएको बताएका छन ।
मन्त्री भण्डारीले ब्यापार घाटा नियन्त्रण गर्न पेट्रोलियम पदार्थको मुल्य निर्धारण गर्ने र किसानले उत्पादन गरेको उखुको बजार मुल्य निर्धारण गदैँ न्युन कर बनाउन सरकार लागि परेको बताए ।
उद्घाटन समारोहमा बोल्दै लुम्बिनी प्रदेश सभा सदस्य बैजनाथ कलवारले औद्योगिक जिल्लाको रूपमा परिचित नवलपरासीको उद्योग र ब्यापारमा क्रान्ति ल्याउन उद्योगधन्दाको विकासमा सरकारले ध्यान दिनुपर्नेमा जोड दिए ।
उद्घाटन समारोहमा नवलपरासीका प्रमुख जिल्ला अधिकारी स्किम श्रेष्ठ, जिल्ला प्रहरी कार्यालयका प्रमुख उपरीक्षक ज्ञानेन्द्र प्रसाद फुयालको उपस्थिति रहेको थियो । साथै वरूण बेभरेज (नेपाल) प्रा.लि को बारेमा विस्तृत जानकारी समेत प्रस्तुत गरिएको थियो ।
त्यस्तै वरूण बेभरेज (नेपाल) प्रा.लि(पेप्सी) का अंतर्राष्ट्रीय प्राविधिक प्रमुख एसएन भट, कन्ट्री डाइरेक्टर त्रय विशाल सिंह ठाकुर, सन्जिब अरोरा र विनोद सिंह साथै कम्पनीका पिआर प्रमुख रविन्द्र पाण्डे, प्लान्टका चन्द्रशेखर बाडगुरु लगायतको उपस्थिति रहेको थियो ।
नवलपरासी जिल्लाको रामग्राममा १४ बिघा जमिनमा वरुण वेभरेजले आफ्नो उत्पादन तथा वितरणको काम गर्दै आएको छ ।
बजारको माग अनुसार देशका सबै भूभागमा आफ्ना उत्पादन पुर्याएर बजार विस्तारमा जोड दिइरहेको वरुण वेभरेज एउटा मल्टीनेसन कम्पनी मात्र नभएर नेपालको एक ‘हाई ट्याक्स पेयर ’कम्पनी पनि भएको बताइएको छ ।
जसले नेपाल सरकारलाई चारदेखि पाँच अर्ब रुपैयाँसम्म कर तिर्ने गरेको छ भने देशमा प्रत्यक्ष रूपमा हजारौँ तथा अप्रत्यक्ष रूपमा दसौँ हजारलाई रोजगारी दिएको जनाएको छ ।
