काठमाडौं । नेपाली कांग्रेसका सभापति शेरबहादुर देउवा भारत जाने भएका छ्न । भारतको प्रयागमा चलिरहेको कुम्भ मेलामा सहभागी हुन देउवा बिहिबार भारत जान लागेका हुन् ।
इण्डिया फाउण्डेसनले ‘कुम्भ ग्लोबल समिट अन डेभलपमेन्ट एण्ड सस्टेइनबेलीटी’ कार्यक्रममा वक्ताको रुपमा सहभागी हुन उनी भारत जान लागेका हुन् । उक्त कार्यक्रम प्रयागराजमा शुक्रबार र शनिबार हुने छ ।
उक्त कार्यक्रममा युपीका मुख्यमन्त्री योगी आदित्यनाथ समेत सहभागी हुँदैछन् । समिट अन्य देशबाट पनि वक्ताका रुपमा आमन्त्रण गरिएको छ ।
४५ दिन चलेर १४ फागुनमा कुम्भ मेला सकिँदैछ । यसअघि कांग्रेस महामन्त्री गगन थापा गंगामा स्नान गरेर फर्किएका थिए ।
यसबाहेक भारतमा देउवाको अन्य कार्यक्रमसमेत तय भएको स्रोतले जनाएको छ । प्रयागबाट देउवा नयाँदिल्ली जानसक्ने बताईएको छ । दिल्लीमा पुगेर देउवाले भारतीय प्रधानमन्त्री नरेन्द्र मोदीसँग भेटको प्रयास गर्ने उच्च स्रोतले जनाएको छ ।
