काठमाडौं । आगामी चैत ५ गते हुने स्वतन्त्र विद्यार्थी युनियन (स्ववियु)को चुनावका लागि सत्तारुढ दल नेपाली कांग्रेसले सातै प्रदेशमा चुनावी कमाण्डर तोकेको छ ।
कांग्रेसले पार्टीको भातृ संगठन नेपाल विद्यार्थी संघबाट उम्मेदवार बन्नेहरुलाई जिताउनका लागि सातै प्रदेशमा कमाण्डर खटाएको हो । चार प्रदेशमा पदाधिकारी र तीन प्रदेशमा कांग्रेसले केन्द्रीय सदस्यलाई चुनावी कमाण्डर तोकेको छ ।
कांग्रेसले सहमहामन्त्रीहरूमा भीष्मराज आङ्देम्बेलाई कोशी, महेन्द्र यादवलाई मधेस, महालक्ष्मी उपाध्याय ‘डिना’लाई बागमती, जीवन परियारलाई गण्डकी तोकिएको छ । साथै, लुम्बिनीमा नेताहरू चन्द्र भण्डारी, कर्णालीमा जीवनबहादुर शाही र सुदूरपश्चिममा एनपी साउदलाई खटाइएको छ ।
कांग्रेसले चुनावको संयोजन तथा व्यवस्थापनका लागि केन्द्रमा महामन्त्री विश्वप्रकाश शर्मा र पार्टी कार्यालयमा संयोजनका लागि नानु बास्तोलालाई जिम्मा दिएको छ ।
महामन्त्री शर्माले स्ववियु चुनावलाई ध्यानमा राखेर पार्टीबाट आवश्यक सहजीकरण गर्नका लागि ७ प्रदेश र ७७ जिल्लामा सर्कुलर गरेका छन् । प्रदेशलाई ७ र जिल्लालाई ११ बुँदे सर्कुलर गरिएको छ । प्रदेश र जिल्ला पार्टी संरचनाले गर्नुपर्ने कार्यहरु उल्लेख गरी सर्कुलर पठाइएको छ ।
सर्कुलरमा नेविसंघलाई जिताउन पार्टीले गर्नुपर्ने आन्तरिक कार्य, भ्रातृ संस्था परिचालन, दुई दलीय संयन्त्रको बैठक, हरेक क्याम्पसमा लागि टीम निर्माण, अनुगमन, फरक फरक जिम्मेवारी लगायतका विषय समेटिएको छ ।
आगामी चैत ५ गते देशभरका क्याम्पसमा स्ववियु चुनाव हुँदैछ । आंगिकतर्फ ६२ तथा १ हजार ४० सम्बन्धन प्राप्त कलेजमा चुनाव हुँदैछ । ०७९ सालमा उपत्यकाका रत्नराज्य लक्ष्मीसहितका केही ठूला क्याम्पसमा विद्यार्थीको झगडाका कारण चुनाव हुन सकेको थिएन् ।
