काठमाडौं । नेपाल राष्ट्र बैंकका गभर्नर डा. विश्वनाथ पौडेल र लुम्बिनी प्रदेशका पूर्व मुख्यमन्त्री तथा नेपाली कांग्रेस संसदीय दलका नेता माननीय डिल्ली बहादुर चौधरीबीच शिष्टाचार भेटघाट सम्पन्न भएको छ ।
भेटमा लुम्बिनी प्रदेशको समग्र विकास, विशेषतः स्वास्थ्य र खानेपानीको पूर्वाधार विस्तारमा नेपाल राष्ट्र बैंकको सहकार्य र सामाजिक उत्तरदायित्व कार्यक्रम अन्तर्गत सहयोग आवश्यक रहेको विषयमा गम्भीर छलफल भएको हो ।
पूर्वमुख्यमन्त्री चौधरीले लुम्बिनी प्रदेशलाई राष्ट्रिय तथा अन्तर्राष्ट्रिय स्तरमा सशक्त बनाउने कार्यमा संघीय निकायहरूको नीतिगत तथा आर्थिक सहयोग अपरिहार्य रहेको उल्लेख गर्दै राष्ट्र बैंकजस्तो संस्थाले प्रदेश विकासमा जिम्मेवार भूमिका निर्वाह गर्नुपर्ने धारणा राख्नुभयो ।
गभर्नर पौडेलले पनि राष्ट्र बैंक सामाजिक उत्तरदायित्व अन्तर्गतका कार्यक्रममार्फत स्वास्थ्य र आधारभूत सेवा क्षेत्रमा लुम्बिनीलाई प्राथमिकता दिन सकिने संकेत गर्नुभयो । यो भेटले प्रदेश–केन्द्र सहकार्यको मार्ग खुला गर्दै आगामी दिनमा लुम्बिनीको पूर्वाधार विकासमा सकारात्मक टेवा पुग्ने विश्वास व्यक्त गरिएको छ ।
