काठमाडौं । नेकपा (एकीकृत समाजवादी) का वरिष्ठ नेता झलनाथ खनालले वामपन्थी दलहरुबीच एकता सम्भव रहेको बताएका छन्, तर त्यसका लागि दम्भ, घमण्ड र आत्मकेन्द्रीत चिन्तन त्याग्नुपर्ने शर्त राखेका छन् ।
शुक्रबार राष्ट्रिय सभागृहमा आयोजित पार्टी एकता सम्बन्धी कार्यक्रममा सम्बोधन गर्दै खनालले यदि सबै वामपन्थी दलहरुले व्यक्तिगत स्वार्थ त्यागी समझदारीपूर्वक अघि बढेमा अहिले नै संसद्मा वामपन्थी बहुमतसहितको सरकार बन्न सक्ने दाबी गरे ।
‘कम्युनिष्टहरु एकतावद्ध भएर जाने हो भने अहिले पनि संसद्मा हामी १३२ भन्दा बढी सिटमा छौं, खनालले वर्तमान अवस्थामा वामपन्थी दलहरु विभाजित हुँदा दक्षिणपन्थी शक्तिहरूलाई फाइदा पुगेको उल्लेख गरे । उनले यदि यो प्रवृत्ति यथावत् रहिरहेमा ०८४ को चुनावी मिसन असफल हुने चेतावनी समेत दिए ।
उनले पार्टी एकता र समझदारीले वामपन्थी आन्दोलनलाई बलियो र क्रान्तिकारी दिशातर्फ अघि बढाउने विश्वास व्यक्त गरे ।
