काठमाडौं l नेपाली कांग्रेसका सभापति तथा पूर्वप्रधानमन्त्री शेरबहादुर देउवाले नेपाली कांग्रेसलाई सच्चा समाजवादी पार्टी भएको दाबी गर्दै पार्टीको सिद्धान्त र आदर्श नै आजको जमानामा सबैभन्दा सशक्त भएको बताएका छन् ।

पार्टी केन्द्रीय कार्यालय सानेपामा आयोजित एक सम्मान कार्यक्रममा बोल्दै देउवाले कांग्रेसको प्रजातान्त्रिक समाजवाद, समावेशिता र पुरानो राजनीतिक परम्पराको महत्त्व औँल्याए। कार्यक्रममा नेपाली कांग्रेस पुस्तकालय तथा पार्टी अध्ययन स्रोत केन्द्र विभागले विशेष सम्मान कार्यक्रम आयोजना गरेको थियो ।

सभापति देउवाले भने, “आजको जमानामा पार्टीको सिद्धान्त र आदर्श निकै महत्त्वपूर्ण कुरा हो। प्रतिस्पर्धी पार्टीहरूमध्ये हाम्रो पार्टीको नै सबैभन्दा राम्रो सिद्धान्त छ। हामी प्रजातान्त्रिक समाजवादको मार्गमा हिँडेको समाजवादी पार्टी हौं ।”

उनले थपे, “कांग्रेस सबैभन्दा पुरानो पार्टी हो। हामीले अंगालेको आदर्श, सिद्धान्त र नीति देशव्यापी रूपमा बुझाउन आवश्यक छ। त्यसले गर्दा नेपाली कांग्रेसले अझै बहुमत प्राप्त गर्ने हैसियत राख्दछ ।”

सभापति देउवाले वर्तमान संविधान समावेशी र समानुपातिक आधारमा बनेको उल्लेख गर्दै नेपाली कांग्रेसले सबै वर्ग, जात, जनजातिलाई समेट्दै अघि बढ्नुपर्ने बताए ।

उनको भनाइमा, “आदिवासी जनजाति, दलित, महिला, मुस्लिम लगायत सबै वर्गका नागरिकलाई कांग्रेसमा समेट्न जरुरी छ। हाम्रो पार्टीले समावेशी सिद्धान्तको नेतृत्व गर्न सक्ने शक्ति राख्दछ ।”

कार्यक्रममा सहभागी नेताहरूले पनि कांग्रेसलाई विचार र मूल्यमा बलियो पार्टीको रूपमा चिनाउँदै समाजवाद र लोकतन्त्रको संरक्षण र प्रवर्द्धनमा जोड दिए ।