काठमाडौं । नेपाली कांग्रेस बागमती प्रदेश संसदीय दलमा देखिएको आन्तरिक विवाद आज टुंगो लाग्ने भएको छ। दलको बैठक सोमबार दिउँसो १ बजे बस्दैछ। किचलो समाधान गर्नका लागि पार्टी सभापति शेरबहादुर देउवाले राजन केसीलाई विशेष दायित्व दिँदै हेटौंडा पठाएका छन् ।
हाल संसदीय दलको नेताको भूमिकामा रहेका मुख्यमन्त्री बहादुर सिंह लामा अल्पमतमा परेका छन्। इन्द्रबहादुर बानियाँको नेतृत्वमा २१ जना सांसदले लामाविरुद्ध हस्ताक्षर गरिसकेका छन्। कांग्रेसका ३७ प्रदेशसभा सदस्यमध्ये लामाको पक्षमा हाल १६ सांसद मात्र रहेको जनाइएको छ ।
दलको नेतामा टिकिरहन लामा पक्षले कम्तीमा थप तीन सांसदको समर्थन जुटाउनुपर्नेछ। लामा आफू प्रतिस्पर्धा गर्न तयार रहेको बताउँदै सांसदहरूको समर्थन जुटाउन सक्रिय छन्। पछिल्ला दिनमा उनले केही सांसदहरूलाई मन्त्री बनाउने प्रलोभनसमेत देखाएको चर्चा समेत सार्वजनिक भएको छ ।
आजको बैठकबाट कांग्रेस संसदीय दलको नेतृत्व परिवर्तन हुने या लामा यथावत् रहने भन्ने टुंगो लाग्नेछ। बागमती प्रदेशको सत्ता समीकरणमा समेत यस निर्णयले ठूलो असर पार्नेछ ।
