काठमाडौं । प्रधानमन्त्रीको सरकारी निवास बालुवाटारमा सत्तारुढ दल नेपाली कांग्रेस र नेकपा (एमाले) का शीर्ष नेताहरूबीच महत्वपूर्ण बैठक जारी रहेको छ। प्रधानमन्त्री केपी शर्मा ओली र कांग्रेस सभापति शेरबहादुर देउवासहित दुवै दलका वरिष्ठ नेताहरू सहभागी छलफल अहिलेको राजनीतिक परिस्थिति र सरकारको पुनःसंरचना सम्बन्धी विषयमा केन्द्रित रहेको बताइएको छ ।
हाल एमाले, कांग्रेस, जनता समाजवादी पार्टी (जसपा) र लोकतान्त्रिक समाजवादी पार्टी (लोसपा) का मन्त्रीहरूबीच फेरबदलको चर्चा चलिरहेका बेला भएको यो बैठकले सत्ता साझेदारी र भावी रणनीतिका विषयमा ठोस निर्णय लिन सक्ने संकेत गरिएको छ। सत्ता सन्तुलन, सरकार सञ्चालनमा प्रभावकारिता र दलहरूबीचको समन्वयलाई ध्यानमा राख्दै मन्त्रीपरिषद् पुनर्गठनको सम्भावनालाई गम्भीरतापूर्वक लिइएको जनाइएको छ ।
बैठकको औपचारिक निष्कर्ष भने अझै सार्वजनिक गरिएको छैन। तर स्रोतका अनुसार, नेताहरूबीच मन्त्रिपरिषदमा भागबन्डा, प्रभावकारी कार्यसम्पादन र गठबन्धनको दीर्घकालीन स्थायीत्वका विषयमा गम्भीर छलफल भइरहेको छ ।
