महेन्द्रनगर l नेपाली काँग्रेसका पूर्व परराष्ट्रमन्त्री एनपी साउदले पार्टीभित्रको विभाजनको कारण जातीयता, सम्प्रदायिकता, क्षेत्रीयता र गुटबन्दी भएको बताउँदै त्यसको समाधानका लागि सबैलाई समेटेर लैजानुपर्नेमा जोड दिनुभएको छ ।

बेदकोट नगरपालिका–७ रौटेलास्थित श्री वैजनाथ धाम तथा वृद्धआश्रम सेवा समितिमा आयोजित खिर खुवाउने कार्यक्रमलाई सम्बोधन गर्दै साउदले भन्नुभयो, “हामी किन विभाजित भयौं भन्दा, यसको मुख्य कारण हो पार्टीलाई प्रशिक्षण दिन नसक्नु ।” उहाँले जातीयता, क्षेत्रीयता वा गुटभन्दा ठूलो पार्टीको विचारधारा र प्रजातान्त्रिक मूल्य नै हो भन्ने स्पष्ट पार्नुभयो ।

साउदले पार्टी कार्यकर्ताहरूलाई गाउँवस्तीमा प्रशिक्षणमार्फत ‘यो पार्टी हाम्रो हो’ भन्ने भावनासहित परिचालन गर्नुपर्ने उल्लेख गर्दै, “प्रशिक्षण प्रभावकारी भए गुटबन्दी, जातीयता, सम्प्रदायिकता जस्ता कुरा समाप्त हुने थिए,” भन्नुभयो ।

उहाँले विकास निर्माण तथा अन्य कामहरूमा पनि पार्टीको भूमिका देखिने गरी समर्पित भएर काम गर्नुपर्ने सुझाव दिनुभयो । “हामी सबैको साझा जिम्मेवारी हो — आफन्तको मात्र हैन,” साउदले भन्नुभयो, “एक्लैले केही हुँदैन, हातेमालो गरेर जनताको अपेक्षा पुरा गरौँ ।”

कार्यक्रमपछि साउदले वेदकोट नगरपालिकाभित्रका विभिन्न मठ–मन्दिर, निर्माणाधीन पुल र सडकहरूको अनुगमन गर्नुभएको थियो। स्थानीयसँग भेटघाट गर्दै उहाँले तिनका समस्याहरूको समाधान गर्न प्रतिवद्धता पनि व्यक्त गर्नुभयो ।

उहाँले जनप्रतिनिधिहरूबीच समन्वय र तालमेल आवश्यक भएको उल्लेख गर्दै कसैको भावना नथिचिने, चित्त नदुखाइने गरि सहकार्यमा अघि बढ्न आग्रह गर्नुभयो ।