काठमाडौं । पूर्वप्रधानमन्त्री डा. बाबुराम भट्टराईले नेपाललाई आगामी २० वर्षभित्र विकसित देशको स्तरमा पुर्याउने लक्ष्यसहित राजनीतिक दलहरूबीच साझा विकास योजनाका लागि प्रतिस्पर्धा हुनुपर्ने बताएका छन्।
नेपाली कांग्रेसको १५औँ महाधिवेशनको उद्घाटन समारोहलाई सम्बोधन गर्दै भट्टराईले देश विकासका लागि स्पष्ट, दीर्घकालीन र साझा योजना आवश्यक रहेको बताए। उनले विकासको योजना बनाएर त्यसको कार्यान्वयनमा राजनीतिक दलहरूबीच प्रतिस्पर्धा गराउनुपर्ने धारणा राखे।
मलेसिया, दक्षिण कोरिया, सिंगापुर र चीनले छोटो समयमै उल्लेख्य आर्थिक तथा सामाजिक प्रगति गरेको उदाहरण प्रस्तुत गर्दै उनले नेपालले पनि आफ्नै विकासको स्पष्ट मार्गचित्र बनाउनुपर्ने बताए।
उनले भने, ‘हाम्रै जीवनकालमा मलेसिया, कोरिया, सिंगापुर, चीनहरू ग्लोबल साउथबाट ग्लोबल नर्थसम्म पुगे भने हामी पनि आगामी २० वर्षभित्र त्यहाँ कसरी पुग्ने ?’
भट्टराईले साझा विकास योजना बनाएर त्यसलाई प्रभावकारी रूपमा कार्यान्वयन गर्ने विषयमा राजनीतिक दलहरूबीच स्वस्थ प्रतिस्पर्धा आवश्यक रहेको बताए। उनका अनुसार दीर्घकालीन लक्ष्य र कार्यान्वयनको स्पष्ट आधार तय गर्न सके मात्रै मुलुकले विकासको गति लिन सक्छ।
राजनीतिक स्थिरताका लागि नयाँ पुस्तामाथि विश्वास गर्नुपर्नेमा पनि उनले जोड दिए। ‘अब पाठ सिकौँ। अब हामीले नयाँ पुस्तालाई विश्वास गर्नुपर्छ,’ भट्टराईले भने।
