काठमाडौं । नेकपा एमालेका महासचिव शंकर पोखरेलले नेपाली कांग्रेससँग सहकार्य गरेर लोकतन्त्रको रक्षा गर्दै मुलुकको मुहार परिवर्तन गर्ने समय आएको बताएका छन्।
नेपाली कांग्रेसको १५औँ महाधिवेशनको उद्घाटन समारोहलाई सम्बोधन गर्दै पोखरेलले कांग्रेस सभापति गगनकुमार थापा गणतन्त्र स्थापनाको आन्दोलनदेखि नै आफूहरूसँग सहकार्य गर्दै आएको स्मरण गरे। त्रिचन्द्र क्याम्पसमा भएको आन्दोलनदेखि आफूहरू सँगै उभिएको उल्लेख गर्दै उनले थापा कांग्रेसको नेतृत्वमा आउनुलाई सकारात्मक घटनाका रूपमा व्याख्या गरे।
‘गगनकुमार थापा गणतन्त्र ल्याउने नेतृत्वको आन्दोलनमा हामीसँगै थियौँ। त्रिचन्द्र क्याम्पसको सभाबाट हामी सँगै उभिएका थियौँ। अहिले पुरानो पार्टी कांग्रेसको नेतृत्वमा आउनुभएको छ। यो एकदमै सकारात्मक कुरा हो,’ पोखरेलले भने।
राणा शासन, पञ्चायत र ज्ञानेन्द्र शाहको शासनविरुद्ध कांग्रेससँग मिलेर आन्दोलन गरेको स्मरण गर्दै उनले आगामी दिनमा पनि लोकतन्त्रको रक्षाका लागि सहकार्य आवश्यक रहेको बताए।
‘अब फेरि पनि मिलेर लोकतन्त्र र यो देशको मुहार फेर्न लाग्नुपर्ने समय आएको छ,’ उनले भने, ‘अब फेरि पनि कांग्रेससँगको सहकार्यमा लोकतन्त्रको रक्षाका लागि लड्नेछौँ।’
पोखरेलले वर्तमान सरकार राजनीतिक दलहरूसँग पर्याप्त छलफल र सहकार्य नगरी अघि बढिरहेको आरोप लगाए। प्रधानमन्त्रीले संसद् र जनताका आवाजसमेत नसुन्ने अवस्था देखिएको भन्दै उनले वर्तमान शासनशैलीप्रति प्रश्न उठाए।
कांग्रेसले आगामी दिनमा लोकतन्त्र र जनतासँग जोडिएका विषयमा नेतृत्वदायी भूमिका निर्वाह गर्ने विश्वाससमेत उनले व्यक्त गरे।
युवाहरूमा निराशा बढ्न नदिन सबै राजनीतिक दल एकजुट हुनुपर्नेमा जोड दिँदै पोखरेलले युवाका सपना पूरा गर्ने जिम्मेवारीमा सहकार्य आवश्यक रहेको बताए।
उनले कांग्रेसको १५औँ महाधिवेशनले नेपाली जनता र जनभावनासँग जोडिएका विषयलाई प्राथमिकतामा राख्दै नयाँ राजनीतिक एजेन्डा अघि सार्ने विश्वास व्यक्त गरे। सूचना प्रविधिको विकासमा कांग्रेस र एमालेले महत्वपूर्ण भूमिका खेलेको उनको भनाइ थियो।
